Liburutegiak “María Moliner” lehiaketara aurkeztu duen proiektua Liburutegia, topaleku izena darama. Eta izen hau jarri diogu, bere esparrua gero eta gehiago erabiltzen delako hainbat jarduera ezberdin egiteko.

Proiektua hiru jarduera-motatan oinarritzen da. Aurrenik, irakurketa bultzatzekoak ditugu: “Zapatuko ipuina”, “Liburua, kulturarako sarbidea”, “Umeen eta helduen irakurketa Klubak”, “interesguneak” , “bookcrossing”, “Hezkuntzaren aldeko mundu kanpaina”, edo “puz-lees (li)buru-hausgarriak) lehiaketa”.

Hurrenik, liburutegiaren egikera onaren barruan sartzen diren zereginak ditugu, honatx: “liburutegi tailerra”, “erabiltzaileen formakuntza”, “liburu-funtsak osasun zentroetan” “Liburuaren nazioarteko eguna”, “emakumeentzako enplegu tailerra”, “e-readerren mailegua irakurketa-aretoan” edo liburutegiaren hedapena sare sozialetan eta webgunean.

Eta, azkenik, esan behar da baita udal liburutegiak gizarte-integrazioaren alde egin dituen jarduerak ere balioespen ona jaso dutela, esate baterako “Munduko Paisaiak” kanpainaren Gidak.

Ahalegin berezia egiten ari gara irakurketa bultzatzeko programak sendotzen eta jorratzen, erabiltzaileen artean irakurketa sustatzeko bidezkoenak iruditzen zaizkigun ekitaldi edo jarduera iraunkorrekin; hori dena, gure bezeroen artean nolabaiteko “irakurketa ohitura” sortzearren.

Jarduera horiei esker, liburutegia Eibarko kultura-erreferentzietako bat dela uste dugu, eskaintzen ditugun zerbitzuak ezagutzera emanez eta topaleku bilakatuz. Gure iritziz, biztanleriaren portzentaje handi bat da liburutegia eduki-hornitzailetzat duena, bai aisialdirako, bai norbere buruaren prestakuntzarako.

Pasa den urtean 132.203 bisita izan genituen Liburutegira. 2011n baino ea 1.800 pertsona gehiago etorri ziren Liburutegiak eskaintzen dituen zerbitzuak erabiltzera.

Maileguan hartutako materialak ere gehiago izan ziren. Guztira 46.191, 2011n baino 2.900 gehiago.

Bazkide berriak, aldiz, gutxiago izan ziren. Hala eta guztiz ere, 474 pertsonek egin zuten iaz Liburutegiko karneta. Dakizuen bezala, karneta hori sareko beste liburutegietan ere erabali ahal da.

Funtsa ere 67.025 titulotara iritsi da, 2011n baino 3.133 ale gehiago.

Gehien mailegatu ziren liburuak hauek izan ziren:

Euskaraz:

Gaztelaniaz:

Bestetik, urtean zehar egindako jardueren artean, aipatu beharrekoak dira Zapatuko ipuineko saioak, non 422 umek parte hartu zuten; umeen irakurketa kluba eta helduen gaztelerazko irakurketa kluba, biok ondo finkatuta dagoeneko; Munduko paisaiak kanpainarako prestatutako gida, gure hizkuntzak ikasteko baliabideak jasotzen duena; jarri izan ditugun interesguneak eta egindako irakurketa gidak… besteak beste.

Aipatzekoa da ere Interneten dugun presentzia: Facebook, Twitter, Pinterest (tresna hau Liburutegian sartzen diren nobedadeen berri emateko erabiltzen dugu), eta blogak (Helduena, eta Umeena)

Atzo goizean ekitaldi hunkigarria izan genuen Liburutegian. María Luisa Ereñak, Fernando Beorleguiren alargunak, kuadro baten dohaintza egin zigun. Hain zuzen ere, “Ararteko“, Beorleguik 1994an Juan San Martini egindako erretratua Ararteko izan zenean.

Ekitaldira Juan San Martinen alarguna, Mari Paz Ibeas, eta Oier bere semea etorri ziren ere. Motza baina hunkigarria izan zen ekitaldi hau, Esther Kareaga zinegotziak kuadroa bistan utzi zuenean, emakume biak emozionatu ziren eta.

Eibarko Udalak, eta bereziki Juan San Martin Liburutegiak, eskerrak eman nahi dizkiote Beorleguiren familiari dohaintza honengatik.

Irakurketa formato berri hau ezagutaraztea izan da Liburutegiaren helburua zerbitzu berri honekin.

Horretarako, 3 irakurgailu erosi dira Eusko Jaurlaritzak eman digun diru-laguntza bati esker, 3 modelo desberdin: Sony Reader, Grammata Papyre eta BQ Readers Movistar.

Horrela, 18 urte baino gehiagoko edonork, Liburutegira bertaratzen denean, aukera izango du 3 tresna hauek erabiltzeko eta beraien arteko konparaketak egiteko. Beraz, norbait halako aparaturen bat erosteko zalantzan baldin badago, hementxe dauka aukera ezin hobea nola erabiltzen den ikusteko, nola irakurri ahal den bertan, …

e-reader bakoitzean 19 e-book sartu ditugu. Gehiago ere sartu ahal ziren, baina Irakurgelan probatzeko direnez ez ditugu titulu gehiago sartu, hala eginda eraginkorragoa izan dadin. Aukeratu diren hizkuntzak hauek izan dira: euskara, gaztelania, frantsesa, ingelesa eta alemana.

Tresna txikia da eta erraz maneiatzekoa denez tresna erosoa da irakurketarako, batez ere ikusmen arazoak dituztenentzat; izan ere, orrialde-zenbaketa eta testuaren tamaina egokitzen lagatzen du, eta gainera tinta elektronikoaren teknologia berriari esker, paperezko liburuak baino kalitate handiagoa eskaintzen du irakuketarako, eta gainera audioliburuak entzuteko aukera ere ematen du, soinua sartzen baitu.

Erabilera araudi bat prestatu da e-readerrak erabili ahal izateko.

Zerbitzu berri honekin Liburutegia gaur egun erabiltzen diren irakurketa era berrietara egokitzen da, eta, bestalde, horien funtzionamenduaz jabetzeko aukera ematen die Liburutegiaren erabiltzaileei.

Eibarko Juan San Martin Liburutegia Facebooken orrialdea egin du. Orain arte perfila geneukan baina atzo bertan aldatu egin genuen. Gure helbidea hauxe da: http://www.facebook.com/EibarkoJsmLiburutegia

Zuen “Me gusta” itxaroten gaude. Animatu!

Twitterren ere kontua zabaldu dugu. Han Liburutegiko berriak, abisuak, nobedadeak, etab. emango ditugu.

Guzti horretaz informatuta egoteko gure jarraitzailea egin beharko zara hemen

Publikatu ditugu Liburutegiko web-ean 2011ko datuak: estatistikak, jarduerak, burututako proiektuak, 2012rako asmoak, etab.

2012an zein izango den Liburutegiko egutegia jakin nahi baduzu, gure web orrialdean ahal duzu deskargatu

Eibarko hiritarrentzako oso berezia den ondare bibliografikoa babesten da Eibarko Juan San Martin Liburutegian

Ondare hau katalogatze prozesuan dago Kultura Ministeritza eta Euskadiko Erkidegoko hitzarmen bati esker eta horren helburua Espainiako Ondare Bibliografikoaren Katalogo Kolektiboa aberastea da. Eibarko Liburutegiaren antzinatasuna kontutan hartuta -1907an sortua- XVI. eta XX. mendeen artean argitaratutako funtsa garrantzitsua daukagu, nahiz eta udal liburutegia izanda.

Fondo horretatik 3 liburu aukeratu ziren zaharberritzeko, eta lana Gipuzkoako Foru Aldundiaren diru-laguntzari esker egin da.

Kontserbazio-lanen helburua ale horiek babestea eta zaintzea da, informazio transmisore funtzioa hobetzearren, eta inprimatze-datak direla-eta lortu ahal izan duten balio fisiko edo arkeologikoagatik. Erabilera mugatua izango dute; noizbehinka liburuaren historiari buruzko erakusketa bibliografikoak egiteko erabiliko dira, betiere kasu bakoitzean segurtasun neurri egokiak hartuta.

Aleen ezaugarriak kontuan izanda, honako berezitasun hauek hautematen dira, besteak beste: bakoitzaren inprimatze sistemak zeintzuk izan ziren, paperaren fabrikazioaren historia, liburuaren ilustrazioa, tipografia, konposizioa, enkuadernazioa…

Honako hauek ere beha daitezke liburuotan: erabiliak eta irakurriak izan diren seinaleak, zainduak izan direla, konponduak. Liburuak erabili zituzten pertsonen istorioak islatzen dituzte, eta orain Liburutegian daude babestu eta hedatzeko asmoz.

Zaharberritutako liburuak honako hauek dira:

• Biblia ad vetustissima exemplaria nunc recens castigata, Romae que revisa: in quibus praeterea quae subsequens Praefatio indicat, capita singula ita versibus distincta sunt… – Lugduni: Apud Gulielmum Rovillium, 1573
• Losada, Luis (S.I.) (1681-1748). Institutiones dialecticae, vulgo summulae ad primam partem philosophici cursus pertinentes. — Salmanticae: ex typographia Francisci Garcia Onorato & San Miguel, 1721
• Mésenguy, François-Philippe (1677-1763). Abrégé de la morale de l’Ancien Testament: ou l’on a conservé autant qu’il a été possible les propres paroles de l’Escriture Sainte avec des eclaircissemens e des reflexions. A Paris: chez Desaint et Saillant…, 1763

Zaharberritze-lanak egin ditugunean oinarrizko egoera larregi ez aldatzen ahalegindu gara, liburuaren beraren istorioa mantentzea ere garrantzitsua iruditzen zaigulako.

Gipuzkoako Foru Aldundiak emandako diru-laguntzaren bidez zaharberritze-gastuaren ia %42 ordaindu da.

Euskal Liburutegi Digitalak, LIBURUKLIKek, bere fondoa sartu du Hispanan.

Eibarko Juan San Martin Liburutegiak LIBURUKLIK daukan fondo digitalizatua orain Hispanan ere kontsultagai dago.

Bere web orrialdean esaten dutenez, Hispanak artxibategien, liburutegien eta museoen bilduma digitalak biltzen ditu, Europar Batasunak sustaturiko Artxibategi Irekiak Ekimenari jarraiki; horrez gain, Espainiako biltegi digitalei dagokienez, Europeanaren antzeko funtzioak betetzen ditu, hau da, bilduma digitalen datu-baseetako edukien eranslea da.

Bilduma horien artean, nabarmentzekoak dira Espainiako unibertsitateen erakundeetako biltegiak eta Autonomia Erkidegoetako liburutegi digitalak, sarbidea eskaintzen baitiete Espainiako ondare bibliografikoko gero eta material mota gehiagori (eskuizkribuak, inprimatutako liburuak, argazkiak, mapak…).

Autonomia Erkidegoetako liburutegi digitalek eta izaera lokalagoa duten beste batzuek beren edukiak eskaintzen dizkiote EuropeanaLocal proiektuari Hispanaren bitartez. Aipaturiko proiektuan Kultura Ministerioak parte hartzen du koordinatzaile nazional gisa, beste 26 herrialdetako 32 erakunderekin batera.