Irakurtzen ikasten dugunean, abilezia jakin bat garatzen dugu, eta abilezia hori oinarrizkoa da eskolara joateko adina duten pertsonentzat. Arrazoia agerikoa da: idatziz transmititzen da jakintza gehiena. Haurrek ez badute ondo irakurtzen, ezin dute ondo ulertu idatzizko euskarri batean dagoen edozein dokumentu, ezin dituzte ulertu gero eta liburu eta dokumentu zailagoak eta, horrenbestez, zailtasunak dituzte beste jakintza-arlo batzuetako jakintza bereganatzeko. Irakurtzeko zailtasunek bizitza osoan irauten badute, pentsatzekoa da ikasleek porrot egingo dutela.

Irakurtzeko abilezia eskasak ondorio larriak ditu, eta banakoaren esparrua gainditzen dituzte ondoriook: ikasketetan arrakasta izatea galarazi ez ezik, ikasketak alde batera uztera bultzatzen du irakurtzeko abilezia eskasa izateak, enpleguaren kalitatea baldintzatzen du helduaroan, eta informazioa eskuratzeko eta herritar gisa parte hartzeko gaitasuna murrizten du.*

*Jardunbide egokien gidaliburua: irakasleak eta irakurketaren irakaskuntza. Eusko Jaurlaritza, Hezkuntza, Unibertsitate eta Ikerketa Saila.

Txosten honen sarrera irakurri ondoren, irakurketa prozesuaren garrantziaz konturatzen gara. Ez da edozein modutan egin behar, batez ere, umeak irakurtzeko zaletasuna edukitzea lortu nahi badugu.

Asko praktikatu behar da eta, horretarako, Liburutegian gida bat prestatu dugu, gurasoak ikasturtean zehar urtero eskatzen dizkiguten liburuez hornituta: letra larria dutenak, letra etzanaz idatzita daudenak, bietan, etab.

Hainbat bilduma daude mota honetako ipuinak ateratzen dituztenak, eta halakoekin irakurketa gida hori egitea bururatu zaigu, gurasoen edota irakasleen aukeraketa lanak errazteko asmoarekin.

Hori bai, aholku bat botatzen ausartzen gara ere: lehenengo pauso hauetan ez laga umea bakarrik irakurri dezan beti. Har ezazue berarekin egoteko momentutxo bat egunero eta irakurriozue ozenki, txikia zenean egiten zenuten moduan. Uste dugu horrela ez zaiola hain gogorra egingo eta irakurketarekin disfrutatzen ikasiko duela.