Gobela, San Nikolas, Villamonte
Atal orokorra
Txinako emakumeen literatura
May 3rd
Emakume txinatarrek idatzitako literaturaren kalitatea eta kopurua azpimarratu behar da. Nahiz eta orduan itzultzen hasi ziren obretako askoren gai nagusia iraultza kulturalean (1966-1976) eta osteko urteetan herri txinatarrak pairatu zituen esperientzia traumatikoak izan, urteek aurrera egin ahala beste era askotako nobelak itzuli dira, bai urte horien aurrekoak bai gaur egungoak, eta abangoardistak ere.
Emakume txinatarren gaur egungo literatura azken hamarkada hain mugitu hauetan bertan etengabe gertatu diren aldaketa sozial eta ekonomiko hain azkar eta sakonak ezagutzeko aukera ematen digun erakusleiho ezin hobea da: barruko lekualdaketak, informaziora eta Internetera isitea, kontsumoari lotuta dauden ohitura berriak… emakume isazleen belaunaldi berrien gaiak dira.
Porgy eta Bess
Mar 26th
Porgy and Bess , Getxoko Kultur Etxeak gomendatzen duen Gershwin-ek ahots beltzetarako konposatutako folk-opera.
Musikala eta opera serioaren arteko linboan kokatua, hiru ezaugarrik egiten dute berezia: osorik iparamerikarra zen lehen opera izateak; bere protagonista guztiak arraza beltzekoak izateak eta jazz -erritmoari eta blues-ari egokitutako melodiek.
Lan honetako iturburua jazz-a eta egiazko musikal iparamerikarrak dira. Izan ere, konpositoreak, George Gershwin-ek (1898-1937) Hollywood-en lan egin zuen sasoi luze baten, Fred Astaire-ntzako arrakasta musikalak konposatuz.
Baina bere egilearentzat bidea ez zen erraza izan; nahiz eta 1935ean New York-eko lehenengo emanaldia arrakastatsua izan, gainerako estatuetan ez zuen oso arrakasta handia lortu, baina bai polemika piztu beti.
Denbora pasatu behar izan zen beltzak protagonistak izanik, haiek kantatutako opera bat, garai hartako Iparramerikan, onartua izateko.
Musikalki askatuz doa, ariaz aria, Hego Karolinako Charleston herriko auzo pobre bateko tragedia. Summertime kanta erreferentzia bihurtu da. Lo-kanta da.
Gershwin gazte hil zen. Eta urteak pasatu ahala, merezi zuen arrakasta lortu zuen. Arte munduan gertatu ohi denez gero, jenioak aurretik doaz. Gaur, egun ona izan daiteke lirismoz eta edertasunez betetako musika honetaz gozatzeko.
Getxoko liburutegietan obra honen material bi dituzue eskura: batak, umeei zuzendutakoak, liburuxka moldatua eta CDa (9 abesti ezagunenak) ditu; besteak opera osoa du DVD batean, 90eko izar bik, Willard White-k eta Cynthia Haymon-ek, bikain abestuta, Simon Rattle-ren zuzendaritzapean.
Goza ezazue!!
Indiako emakumeen literatura
Mar 5th
Indiako literatura oparoa eta askotarikoa da eta gehienbat ingelesez idazten duten emakume idazleen eskutik iristen zaigu; nagusia den generoa nobela da.
Nobela horiek gehienetan mardulak izaten dira eta, gaiari dagokionez, ausartak; askotan eleberri horiek familia osoen historia luzeen kronikak izaten dira eta, horietan, gehiago edo gutxiago exotikoa izan daitekeen iraganaren irudia egiteaz gain, kolonizazioaren eta deskolonizazioaren prozeduraren atal bat kontatzen zaigu eta azaldu egiten zaigu nola emakumeak, pobrezia edo isolamendu baldintzarik gordinetan ere, euren inguruko gizarte baldintzen eragile izan diren. Halaber, landutako ohiko gaiak euren amodiozko kontuak eta ezkontzak dira (ezkonsariak, kasten sistemak eta patriarkatuak baldintzatutakoak), eta euren seme-alaben bizi-baldintzak hobetzeko egin dituzten ahaleginen berri ematen digute.
Azken hamarkadetan, emakume idazleek gaur egungo Indian gertatzen diren bizitzako tentsio eta kontraesan guztiak jakinarazten dizkigute, bere iragan kulturalarekin harro dagoen herria, klase ertain-altu (maila horretakoak dira emakume idazlerik gehienak) gero eta kosmopolitagoa duena, baina artean, oso kontserbadorea dena emakumeen eskubide eta askatasunei dagokienez.
Ekialde Ertaineko emakumeen literatura
Jan 24th
Egun hauetan, Villamonteko Liburutegian Ekialde Ertaineko emakumeen literaturaren aukeraketa bat jarri dugu zure esku.
Denok ezagutzen ditugu Mendebaldeak Ekialde Ertainaren inguruan sortu dituen estereotipoetako batzuk: harem inperialaren munduarekin lotutako iragan exotikoa eta fundamentalismo erlijiosoak eta gatazka politiko bizi batek markaturiko orainaldia. Gainera, “islam” terminoaherrialdeak, etniak eta kulturak erlijioarekin nahasten eta bat egiten duten amalgama bat bihurtu da. Horren emaitza gisa, emakumeaz irudi hauxe besterik ez da geratu: odaliska edo esklabo pasiboa… edo gaur egungoa: hainbat eratako beloak daramatzana eta familiaren, politikaren eta erlijioaren esparruan era guztietako abusuak pairatzera etsitako biktima dena.
Ekialde Ertaineko emakumeen literatura izan daiteke, beharbada, errealitate horiek, haiek bizi eta interpretatzeko duten moduaren arabera ezagutzeko tresna azkar eta eraginkorrenetako bat. Emakume horiek biktimismoaren tentaldian ez erortzen saiatzen dira, eta, nahiz eta denok aurki ditzakegun lekukotza benetan dramatikoak, askok bizipen aski bihurriak, ankerrak, bidegabeak eta mingarriak kontatzen baitituzte, haien kontakizunak zintzoak, kritikoak, ironikoak, lirikoak eta umorezkoak izan ohi dira.
(Eskerrik asko Skolastikaren Josune Muñoz-i eta Fundeso Euskadi-ri, testuengatik eta liburuen aukeraketan haien laguntzagatik)
BADATOR GETXOKO KOMIKI AZOKA!
Nov 20th
Datorren ostiralean, azaroak 23, Getxoko 11. Komiki Azoka abiatuko da eta, hiru egunez, biñetaren mundua gerturatuko du. 60 saltokiz osatutako gune komertzialaz gain, hainbat jarduera egongo bertan. Komikizaleek ezinbesteko topagune izango dute Azoka, ohi denez Areetako Geltokia plazako karpan kokatuko dena.
Aurten ere ospe handiko egileak egongo dira Getxon. Horiek guztiak hitzaldietan eta aurkezpenetan ariko dira eta hain arrakastatsuak diren sinatze-txandetan ere. Horrela, zaleek autorerik gustukoenak zuzen-zuzenean ezagutzeko aukera dute. Oraingo honetan, besteak beste, Eddie Campbell eskoziarraren mailako egileak egongo dira; nazioarte mailan ezaguna da Campbell, Alan Moore-ekin “From Hell” komiki ezagunean egindako lankidetzagatik. Bere azken lana aurkeztuko du Getxon: “Mi libro sobre el dinero”.
Miguelanxo Prado ere etorriko da Getxora, Europa mailako autore espainiar ezagunenetako bat; laster aurkeztuko du “Ardalén” bere lan berria. Haiekin batera, Alfonso Zapicok parte hartuko du, James Joyce idazlearen bizitzan oinarritutako “Dublinés” lanagatik Komikiaren Sari Nazionala jaso berri duen egilea. Aurrez sari hori bera jaso duten beste bi autore ere izango ditugu gure artean: Max eta Santiago Valenzuela. Horiez gain, Mauro Entrialgo, Marika, Teresa Valero, Hernán Migoya, Albert Monteys, Manuel Bartual, Javier Pulido, Javier de Isusi eta beste asko ere egongo dira azokan. Villamonteko Liburutegian erakusketa bat prestatu dugu egile hauen komikiekin, mailegu moduan eskuragarri. Sakatu hemen liburutegian jasotako komiki helduberriak ikusteko
Azokak urtero komiki munduko profesionalei egiten dien omenaldietako protagonistak Europako komiki argitaletxe garrantzitsuenetakoa den Norma Editorial eta Ondarroako Komiki Jardunaldiak bezalako ekimenen bitartez bineta mundua sustatzen urteak daramatzan Luterl Taldea izango dira.
Behean, programo osoa daukazu.
San Nikolas liburutegiko irtenberriak
Nov 9th
Hauek dira San Nikolas Liburutegian erositako ikus-entzunezko material berriak, jada eskuragarri mailegu moduan. Egin klik irudietan laburpen txiki bat ikusteko.
Gainera, hilabete honetan beste formatu berri bat gehitu dugu: etxean blu-ray irakurle bat daukatenentzat; gure dokumentalen irudiak ahalik eta hoberen ikusi ahal izateko.
Munduko paisaiak: Magrebeko Kulturak (irakurketa gida)
Oct 30th
Pasa den urtean, MAGREBEKO KULTUREI buruzko Irakurketa Gida interesgarri bat argitaratu genuen bilduma honetan bertan (Basauriko liburutegiek prestatuta), eta batez ere inprimatutako materialak eskaintzen ziren. Aurten, berriz, gida hori betetzeko asmoz, beste era bateko euskarriak gehitu ditugu: musika, zinema, baita komikiak zein liburu marrazkidunak ere.
Egile magrebtarren lanak dira, edota, beste jatorri bateko egileenak izanda ere, Afrikako iparraldeko herrialde hauen kultur aniztasuna eta aberastasuna islatzen dute: Aljeria, Libia, Maroko, Mauritania, Mendebaldeko Sahara eta Tunisia.
Hainbat materialen artean, bakoitzak bere interesekoa den baten bat topatzea espero dugu.
Magreb-i buruzko jardunaldiak
Oct 26th
Afrikako iparraldean kokatuta, Mediterraneoko hegoaldeko itsasertzaren eta basamortuaren artean, Magrebeko sozietateek kultura-oinordetza handia eta askotarikoa batu dute, Aljeria, Libia, Maroko, Mauritania, Mendebaldeko Sahara eta Tunisiatik hedatzen dena.
Getxoko udal liburutegiek, “Munduko Paisaiak” programaren barruan, aniztasun sozial eta kultural hori gure herrikideei helarazi nahi diogu. Horretarako, irakurketa gida bat egin dugu eta jardunaldi hauek antolatu ditugu, ekintzaz beteta: anitzak, parte hartzekoak, interesgarriak, dibertigarriak… Bi astetan zehar, nork bere gustukoa den baten bat aurkitzea espero dugu.
Gida egiteko eta jarduerak antolatzeko, hauen laguntza izan dugu: udaletxeko Immigrazio zein Kooperazio arlokoena, Atfal, Schams, Casa Libia eta Lalla-Bouhia elkarteena, baita Festival Amal, Biltzen eta Eusko Jaurlaritzaren Liburutegi Zerbitzuarena. Mila esker horiei guztiei.
Programa osorik ikusi nahi baduzu, sakatu beheko irudian.
“Legado de mar”, Manuel Torres Goiri
Oct 18th
Gaur, Manuel Torres Goiri idazle getxoztarra aurkeztu nahi dizuegu. Egile horren bizitza eta lana oso lotua egon da betidanik itsasoari.
Nautika eta Itsasoko Garraioan lizentziaduna da, eta merkataritza-nabigazioko pilotua. 90eko hamarkadan lehorreratu eta Bilbon itsas lanetan sartu zen; hantxe jarraitzen du gaur egun.
San Nikolaseko liburutegian laster aurkeztuko dugun lana, Legado de mar izenekoa, bere lehendabiziko eleberria da, itsasoari eta abenturari buruzkoa. Merkantzia-ontziak eta bertako marinela benetan nolakoak diren erakusten du Algortako kapitan baten ikuspuntutik. Juventud argitaletxeak atera du, Nostromo bilduman.
Liburu hau marinelentzat, itsasozaleentzat eta, nola ez, Algortako iraganeko itsas jendearen bizitza nolakoa zen ezagutu nahi duen edozein algortarrentzat da.
Manuel Torres Goirik beste bi lan ditu itsasoko historiaren gainekoak: Aproximación a la historia del salvamento de náufragos en el Puerto de Bilbao (3. argitalpenean dago jada) eta La compañía Marítima del Nervión: los hombres, la empresa y los barcos, Jesús María Valdalisorekin eta Eugenio Torresekin batera idatzia. Guztiak gure liburutegietan daude
Source: Uploaded by user via Getxo.Liburutegiak on Pinterest
